सच्चें मुच्चे गैह तुस मीगी – बसारा करदे ओ
सोचॉं पता नई मेरे बिना -कियॉं गुज़ारा करदे ओ
मैं तुन्दी मॉं बोली -तुहाड़ी मातृ भाषा हॉं
पूरे गरॉं दी,शहरा दी ते परदेशा दी इक आशा हॉं
अपनी भाषा च गल्ल करन कोला भी डरदे ओ
सोचॉं पता नई मेरे बिना-कियॉं गुज़ारा करदे ओ
डोगरी इक भाषा ई नईं – इक मान ते सम्मान एै
डोगरी जम्मू दी भाषा एै-जानदा सारा हिन्दुस्तान एै
तुस अुण अंगरेजीयत पासे चली पये-केह करदे ओ
सोचॉं पता नई मेरे बिना – कियॉं गुज़ारा करदे ओ
बड़ी फकरा दी गल्ल एैह -अपनी भाषा दा प्रचार करना
भामें कोई किस भी आखै-नई कुसा कोला डरना
जेहड़े चुप रहन्दे नै – ठण्डीयॉं आंवा भरदे ओ
सोचॉं पता नई मेरे बिना – कियॉं गुज़ारा करदे ओ
दूसरी भाषाएँ दा ज्ञान ओना – चंगी गल्ल एै
पर अपनी भाषा पर गर्व ओना-सुआदला फल एै
बोली अपनी पहचान एै “वीरेन्द्र”-जिहदे पर अभिमान करदे ओ
सोचॉं पता नई मेरे बिना -कियॉं गुज़ारा करदे ओ
सच्चें मुच्चे गैह मींगी – बसारा करदे ओ
सोचॉं पता नई मेरे बिना – कियॉं गुज़ारा करदे ओ
वीरेन्द्र कुमार मन्सोतरा
